19-уми августи соли 2026 дар Донишгоҳи давлатии тиҷорати Тоҷикистон ҷаласаи ҳарсолаи нақшавии Шурои ректорон ва намояндагони донишгоҳҳои иштирокчии Донишгоҳи Созмони Ҳамкории Шанхай (ДСҲШ)-и Ҷумҳурии Тоҷикистон, ки ба он 11 донишгоҳи бонуфузи кишвар дохил мешаванд, баргузор гардид.

Чорабинӣ аз ҷониби ректорати Миллии Донишгоҳи СҲШ-и Ҷумҳурии Тоҷикистон, ки дар заминаи Донишгоҳи давлатии тиҷорати Тоҷикистон фаъолият мекунад, бо мақсади рушд ва ҳамоҳангсозии фаъолияти минбаъдаи муассисаҳои таҳсилоти олии касбии Тоҷикистон дар доираи шабакаи Донишгоҳи СҲШ, инчунин татбиқи қарорҳои Шурои Ҳамоҳангсози Донишгоҳи СҲШ ташкил карда шуд.

Ҷаласа дар шакли омехтаи ҳузурӣ ва фосилавӣ бо иштироки роҳбарон ва намояндагони муассисаҳои таҳсилоти олии Ҷумҳурии Тоҷикистон – иштирокчиёни Донишгоҳи СҲШ гузаронида шуд.

Дар ҷараёни ҷаласа таваҷҷуҳи асосӣ ба баррасии вазъи кунунии ҳамкории муассисаҳои таҳсилоти олии Тоҷикистон дар доираи Донишгоҳи СҲШ, самтҳои ояндадори рушди ҳамкориҳои таълимӣ ва илмӣ, инчунин омода намудани мавод ва пешниҳодҳо мутобиқи қарорҳои Шурои Ҳамоҳангсози Донишгоҳи СҲШ равона карда шуд.

Муҳокимаи масъалаҳои марбут ба сафари дарпешистодаи ҳайати ректорати Донишгоҳи СҲШ ба Ҷумҳурии Тоҷикистон, инчунин муайян намудани қадамҳои минбаъдаи густариши иштироки муассисаҳои таҳсилоти олии Тоҷикистон дар татбиқи лоиҳаҳои муштараки таълимӣ ва илмӣ - таҳқиқотӣ аҳаммияти махсус дошт.

Дар ҷараёни ҷаласа иштирокчиён доираи васеи масъалаҳои рӯзномаро баррасӣ намуданд. Зимни ҷаласа ректори Миллии Донишгоҳи СҲШ-и Ҷумҳурии Тоҷикистон, ректори Донишгоҳи давлатии тиҷорати Тоҷикистон, профессор Назарзода Хайрулло Холназар ба иштирокчиён дар бораи рафти татбиқи қарорҳои ҷаласаи қаблии Шурои Ҳамоҳангсози Донишгоҳи СҲШ, ки 29-уми апрели соли 2026 дар Донишгоҳи дӯстии халқҳои Россия ба номи Патрис Лумумба баргузор гардида буд, иттилоъ дод.

Хайрулло Холназар таъкид намуд, ки иштироки муассисаҳои таҳсилоти олии Тоҷикистон дар фаъолияти Донишгоҳи СҲШ барои рушди ҳамкориҳои байналмилалии академӣ, густариши робитаҳои байнидонишгоҳӣ, татбиқи барномаҳои муштараки таълимӣ ва лоиҳаҳои илмӣ - таҳқиқотӣ, вусъат бахшидани табодули академии омӯзгорон ва донишҷӯён, инчунин ташаккули салоҳиятҳои муосир, ки дар шароити дигаргунсозии рақамии иқтисодиёт ва ҷомеа тақозои замон мебошад, имкониятҳои иловагӣ фароҳам меорад.

Дар ҷаласа ба рушди таҳсилоти рақамӣ ва салоҳиятҳои рақамӣ, густариши ҳамкориҳои илмӣ байни донишгоҳҳои давлатҳои аъзои СҲШ, инчунин фаъолгардонии иштироки муассисаҳои таҳсилоти олии ватанӣ дар лоиҳаҳои бисёрҷонибаи Донишгоҳи СҲШ таваҷҷуҳи махсус зоҳир карда шуд.

Иштирокчиёни ҷаласа зарурати таҳкими минбаъдаи ҳамкорӣ байни муассисаҳои таҳсилоти олии Ҷумҳурии Тоҷикистон - иштирокчиёни Донишгоҳи СҲШ, таъмини низомноки ҳамоҳангсозии фаъолият ва баланд бардоштани самаранокии иштироки онҳо дар ташаббусҳои байналмилалии таълимӣ ва илмиро муҳим арзёбӣ намуданд.

Аз рӯи натиҷаҳои масоили муҳокимагардида самтҳои афзалиятноки кори минбаъдаи ректорати Миллӣ ва МТОК – иштирокчиёни Донишгоҳи СҲШ-и Ҷумҳурии Тоҷикистон муайян карда шуда, пешниҳодҳо ва тадбирҳои дахлдори ташкилӣ мувофиқа карда шуданд.

Баргузории ҷаласаи Шурои ректорон дар омодасозии ҷониби Тоҷикистон ба чорабиниҳои дарпешистодаи Донишгоҳи СҲШ ва густариши минбаъдаи ҳамкориҳои байналмилалӣ дар соҳаи маориф ва илм қадами муҳим ба ҳисоб меравад.

Ректорати миллии Донишгоҳи СҲШ-и Ҷумҳурии Тоҷикистон изҳори боварӣ намуд, ки ҳамоҳангсозии пайвастаи фаъолияти муассисаҳои таҳсилоти олӣ ва иштироки фаъолонаи ҷониби Тоҷикистон дар татбиқи ташаббусҳои Донишгоҳи СҲШ ба таҳкими ҳамкориҳои таълимӣ, илмӣ ва инноватсионӣ байни давлатҳои аъзои Созмони Ҳамкории Шанхай мусоидат хоҳад кард.

Донишгоҳи давлатии тиҷорати Тоҷикистон, Ректорати миллии Донишгоҳи СҲШ-и Ҷумҳурии Тоҷикистон, шаҳри Душанбе, 19 августи соли 2026