Яке аз омилҳои муҳими баланд бардоштани сифати таҳсилот омӯзиши таҷрибаи кишварҳои хориҷӣ ва ҷалби профессорону мутахассисони шинохтаи ҷаҳонӣ барои гузаронидани машғулиятҳо ва семинару мизҳои мудаввар дар муассисаҳои таҳсилоти олии ҷумҳурӣ ба ҳисоб меравад.
Дар робита ба ин, раёсати Донишгоҳи давлатии тиҷорати Тоҷикистон дар мувофиқа бо Вазорати маориф ва илми Ҷумҳурии Тоҷикистон дар доираи барномаи Фулбрайт (Fulbright Program) 2 нафар профессорони Донишгоҳи Питсбурги Иёлоти Муттаҳидаи Амрико – Дуглас Шоффилд ва Жаннет Шоффилдро даъват намуд. Дуглас ва Жаннет Шоффилд профессорони соҳаи сайёҳӣ ба ҳисоб рафта, тӯли 2 моҳ дар донишгоҳ барои гурӯҳҳои таҳсилашон бо забони англисӣ машғулиятҳои лексионӣ ва амалӣ мегузаронанд. Ҳамчунин ташкил ва баргузории семинару мизҳои мудаввар бо иштироки магистрону муҳаққиқони ҷавон дар бахши рушди сайёҳӣ ва баланд бардоштани сифати хизматрасонӣ ба нақша гирифта шудааст.
Рӯзи 16 марти соли ҷорӣ ректори донишгоҳ Маҳмадалӣ Қурбонзода профессорони даъватшударо ба ҳузур пазирифта, нахуст оид ба самти афзалиятноки сиёсати иқтисодии Ҷумҳурии Тоҷикистон эълон шудани соҳаи сайёҳӣ ва ҳунарҳои мардумӣ андеша ронда, қайд намуданд, ки ин бахши муҳими иқтисоди миллӣ зери таваҷҷуҳи бевоситаи Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон қарор дорад. Ҳамчунин зикр гардид, ки яке аз масъалаҳои муҳими рушди соҳаи сайёҳӣ ин тайёр кардани мутахассисони баландихтисос ба ҳисоб меравад ва дар ин самт нақши омӯзиши таҷрибаи хориҷӣ басо назаррас мебошад. Изҳори умед карда шуд, ки ташрифи профессорони хориҷӣ метавонад дар болоравии сатҳу сифати таҳсилот нақши арзанда гузорад.
Дар навбати худ меҳмонон ба ректори донишгоҳ ҷиҳати пазироии хуб изҳори миннатдорӣ намуда, фикру андешаҳои худро оид ба такмили барномаҳои таълимии бахши сайёҳӣ ва дигар самтҳои ҳамкориҳои минбаъда изҳор доштанд. Бо қаноатмандӣ зикр гардид, ки ташрифи онҳо дар арафаи таҷлили ҷашни байналмилалии Наврӯз баргузор мегардад, ки онҳо имкони бенштар пайдо мекунанд то аз фарҳангу анъанаҳои миллии кишвари мо боз ҳам аз наздик шинос гарданд.
Шуъбаи ҳамкориҳои байналмилалӣ